Лицейдин тарыхы

«Таштак» мектебинин негизделиши

1926-жылдын сентябрь айында Фрунзе шаарында республикада улуттук мектептердин алгачкыларынан болуп кыргыз башталгыч Таштак мектеби уюшулган. Бар болгону 67 окуучу жана 6 педагог, Москва жана Герцен көчөлөрүнүн кесилишиндеги кичине имаратта эки класстык бөлмө. Биринчи директору — Б. Койчуманов; мугалимдери: К. Каримов, Д. Көкүмөв, А. Ровнягина, О. Жүндүбаев, Н. Шамгунова жана башкалар.

№5 жети жылдык мектеп

1932–1933-окуу жылында кыргыз башталгыч мектеби №5 кыргыз жети жылдык мектеби болуп кайра уюшулган.

Биринчи 8-класс жана алгачкы күбөлүктөр

Биринчи жолу 8-класс ачылып, Кыргызстандын ар түрдүү районунан келген жети жылдык мектептерди бүтүргөн 30 окуучу кабыл алынган. Ошол эле жылы №5 кыргыз орто мектебин 10-класстын 17 окуучусу бүтүргөн — булар кыргыз советтик орто мектебин биринчи жолу бүтүрүп күбөлүк алган кыргыз уландары менен кыздары эле.

Республикадагы биринчи мектеп-интернат

Мектептин алдында республикада биринчи болуп интернат уюштурулган — интернатта жашагандар мамлекет тарабынан толук камсыз кылынган. 1938-жылы Токтогул көчөсүндөгү эки кабаттуу жаңы имарат интернат үчүн берилген. Башчысы болуп Акзамов Нажим Шингазович дайындалган.

«Көчмөндүк мезгили»

Мектепке орун изделип 3–4 жолу көчүрүлгөн: Москва–Герцен көчөсүнөн — М. Абдыраев атындагы музыкалык мектебине, андан «Юный техник» клубуна, андан №3 орус мектебине, акырында Токтогул–Совет көчөлөрүнүн кесилишиндеги эки кабаттуу имаратка. 1966-жылы мектептин 40 жылдык юбилейи салтанаттуу белгиленген.

Өзүнүн жаңы имараты

Мектеп Токтогул көчөсүндөгү жаңы имаратка көчүп кирген: үч кабаттуу окуу корпусу жана беш кабаттуу интернат. 10-класстардын бүтүрүүчүлөрүнүн саны республиканын бардык райондорунан келген окуучулардын эсебинен жыл сайын өскөн.

№5 мектеп-гимназиясы

1990-жылдын 16-августундагы Фрунзе шаардык Советинин аткаруу комитетинин чечими менен №5 мектеп гимназия болуп уюшулган.

Улуттук компьютердик гимназия

1997-жылдын 6-майында Кыргыз Республикасынын Президентинин Указы менен «Улуттук компьютердик гимназия» болуп уюшулган.

А. Молдокуловдун ысымы

2010-жылдын 5-октябрында КРдин Президентинин Указы менен мектепке эмгеги сиңген ардактуу мугалим А. Молдокуловдун ысымы берилген.

Улуттук инновациялык технологиялар мектеп-лицейи

2019-жылдын 4-мартында Кыргыз Республикасынын Өкмөтүнүн №98 токтому менен профессор Айдаркан Молдокулов атындагы Улуттук компьютердик гимназиясы профессор Айдаркан Молдокулов атындагы Улуттук инновациялык технологиялар мектеп-лицейи деп кайра аталган.

100 жылдык маарек

2026-жылдын 17-октябрында мектеп-лицей кылымдык мааракесин белгилейт — «Таштак» мектебинен улуттук инновациялык технологиялар лицейине чейинки кылымдык жол.